ຄະນະກັມມາທິການການຕ່າງປະເທດ ສູນກາງ ອພສ ຈັດກອງປະຊຸມສາມັນປະຈໍາເດືອນເມສາ 2026

ໃນຕອນບ່າຍຂອງວັນຈັນ ທີ 20 ເມສາ 2026, ຄະນະກັມມາທິການການຕ່າງປະເທດ (ກຕປ) ສູນກາງອົງການພຸດທະສາສະໜາສັມພັນ ແຫ່ງ ສປປ ລາວ (ອພສ) ໄດ້ຈັດກອງປະຊຸມສາມັນຄົບຄະນະຂຶ້ນຢ່າງເປັນທາງການ ເພື່ອທົບທວນຄືນໝາກຜົນການເຄື່ອນໄຫວວຽກງານ ແລະ ວາງທິດທາງແຜນການບຸລິມະສິດສຳລັບໄລຍະຕໍ່ໜ້າ.

ກອງປະຊຸມຄັ້ງນີ້ ໄດ້ຮັບກຽດເມດຕາເປັນປະທານໂດຍ #ພຣະອາຈານໃຫຍ່ ປອ. ດຳຣົງ ພິມມະຈັກ, ຄະນະບໍລິຫານງານປະຈໍາການ, ຮອງປະທານສູນກາງ ອພສ, ຫົວໜ້າກຳມາທິການການຕ່າງປະເທດ ສູນກາງ ອພສ, ພ້ອມດ້ວຍພຣະອາຈານ ປອ. ດາວສະເດັດ ເລີດມະນີ, ຄະນະບໍລິຫານງານປະຈຳການ, ຮອງຫົວໜ້າກັມມາທິການການຕ່າງປະເທດ ແລະ ຄະນະກັມມາທິການເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ພິຈາລະນາບັນດາເນື້ອໃນສຳຄັນຕ່າງໆ ໂດຍສະເພາະແມ່ນການສະຫຼຸບຜົນການເຄື່ອນໄຫວໃນເວທີສາກົນ, ວຽກງານຝຶກອົບຮົມພຣະສະມະນະທູດ ແລະ ທຶນການສຶກສາແລກປ່ຽນ, ການຫັນວຽກງານຂໍ້ມູນຂ່າວສານເປັນດີຈິຕອນ, ການທົບທວນຄວາມຄືບໜ້າວຽກງານການອັນເຊີນພຣະບໍຣົມມະສາຣີຣິກະທາດຈາກອິນເດຍສູ່ປະເທດລາວ, ການສະຫຼຸບຕີລາຄາພຣະສົງລາວທີ່ສະໝັກທຶນການ ສຶກສາ ICCR, ແລະ ການກະກຽມເຂົ້າຮ່ວມງານສະເຫຼີມສະຫຼອງວິສາຂະບູຊາໂລກຄັ້ງທີ 21.

#ຜົນສຳເລັດໃນເວທີສາກົນ

ທີ່ປະຊຸມໄດ້ຮັບຟັງການລາຍງານຜົນສຳເລັດຂອງການເຂົ້າຮ່ວມກອງປະຊຸມລະດັບສາກົນທີ່ສຳຄັນໃນໄລຍະຜ່ານມາ ເຊິ່ງເປັນການຍົກສູງບົດບາດຂອງຄະນະສົງລາວໃນເວທີໂລກ ໂດຍສະເພາະແມ່ນ:

• #ປະເທດອິນເດຍ: ການເຂົ້າຮ່ວມກອງປະຊຸມສຸດຍອດພຸດທະສາສະໜາເພື່ອສັນຕິພາບໂລກ ຄັ້ງທີ 1 (WBPC 2026) ແລະ ກອງປະຊຸມສຸດຍອດພຸດທະສາສະໜາແຫ່ງອາຊີ ເພື່ອສັນຕິພາບໂລກ ຄັ້ງທີ 16 (ABCP).

• #ປະເທດຍີ່ປຸ່ນ: ການເຂົ້າຮ່ວມກອງປະຊຸມສຸດຍອດຊາວພຸດໂລກ ຄັ້ງທີ 9.

ການເຄື່ອນໄຫວເຫຼົ່ານີ້ຖືເປັນບາດກ້າວສຳຄັນໃນການຂັບເຄື່ອນວຽກງານການຕ່າງປະເທດ ເພື່ອສ້າງສັນຕິພາບ ແລະ ຄວາມຮ່ວມມືລະຫວ່າງຊາວພຸດໃນທົ່ວໂລກ.

#ວຽກງານພຣະສະມະນະທູດ ແລະ ທຶນແລກປ່ຽນການສຶກສາ

ກອງປະຊຸມໄດ້ປຶກສາຫາລືກ່ຽວກັບ:

• #ໂຄງການພຣະສະມະນະທູດ: ການກຽມຄວາມພ້ອມໃນການຝຶກອົບຮົມພຣະສະມະນະທູດລາວ ຊຸດທີ 2 ເຊິ່ງມີແຜນຈະດຳເນີນການໃນໄລຍະກາງປີນີ້ ເພື່ອເປັນກຳລັງສຳຄັນໃນການເຜີຍແຜ່ພຸດທະສາສະໜາທັງພາຍໃນ ແລະ ຕ່າງປະເທດ.

• #ທຶນແລກປ່ຽນການສຶກສາຢູ່ ສປ ຈີນ: ການພິຈາລະນາຄັດເລືອກພຣະສົງໜຸ່ມລາວຮອບສຸດທ້າຍ ເພື່ອເດີນທາງໄປແລກປ່ຽນການສຶກສາຢູ່ ສະຖາບັນການສຶກສາພຣະພຸດທະສາສະໜາໜານໄຫ່ ສົກປີ 2026-2027, ເຊິ່ງເປັນການສືບຕໍ່ຜັນຂະຫຍາຍໝາກຜົນການຮ່ວມມືລະຫວ່າງ ສູນກາງ ອພສ ແລະ ສະມາຄົມພຸດທະສາສະໜາແຫ່ງປະເທດຈີນ.

#ການຫັນວຽກງານຂໍ້ມູນຂ່າວສານເປັນດີຈິຕອນ

ໃນທີ່ປະຊຸມຍັງໄດ້ຮັບຟັງການຖ່າຍທອດວິທີການສ້າງຖານຂໍ້ມູນ (Database) ຂອງວຽກງານການຕ່າງປະເທດ ໃຫ້ເປັນລະບົບດີຈິຕອນ ເພື່ອຄວາມທັນສະໄໝໃນການຈັດເກັບ ແລະ ຄົ້ນຄວ້າຂໍ້ມູນ. ການນຳສະເໜີດັ່ງກ່າວແມ່ນໂດຍ #ພຣະອາຈານ ປອ. ອານັນທະສັກ ພັດທະສີລາ, ຄະນະກັມມາທິການສູນກາງ ອພສ.

#ວຽກງານອື່ນໆທີ່ສຳຄັນ

• #ການອັນເຊີນພຣະບໍຣົມມະສາຣີຣິກະທາດ: ທົບທວນຄວາມຄືບໜ້າວຽກງານການອັນເຊີນພຣະບໍຣົມມະສາຣີຣິກະທາດຈາກອິນເດຍສູ່ປະເທດລາວ. ຄາດວ່າຈະສາມາດດໍາເນີນການຈັດຕັ້ງປະຕິບັດການປະສານກັບພາກສ່ວນທີ່ກ່ຽວຂ້ອງ ແລະ ອັນເຊີນມາໃນທ້າຍປີ 2026 ນີ້.

• #ທຶນການສຶກສາ ICCR: ສະຫຼຸບຕີລາຄາ ແລະ ສັງລວມພຣະສົງລາວທີ່ໄດ້ສະໝັກທຶນການສຶກສາຂອງ ICCR ໃນສາຂາຕ່າງໆ ໃນສົກປີ 2026-2027.

• #ງານວິສາຂະບູຊາໂລກ: ກະກຽມດ້ານເນື້ອໃນ ແລະ ການປະສານງານໃຫ້ແກ່ປະທານສູນກາງ ອົງການພຸດທະສ່ສະໜາສັມພັນແຫ່ງ ສປປລາວ ທີ່ຈະເດີນທາງເຂົ້າຮ່ວມງານສະເຫຼີມສະຫຼອງວິສາຂະບູຊາໂລກຄັ້ງທີ 21 ຢູ່ ສປ ຈີນ ແລະ ຣາຊະອານາຈັກໄທໃນເດືອນພຶດສະພາທີ່ຈະມາເຖິງນີ້.

ໃນທີ່ປະຊຸມ, ໄດ້ມີການປະກອບຄໍາເຫັນຢ່າງກົງໄປກົງມາດ້ວຍຄວາມຮັບຜິດຊອບຕໍ່ບັນດາປະເດັນທີ່ຍົກຂຶ້ນ. ວຽກງານບາງດ້ານສາມາດຈັດຕັ້ງປະຕິບັດໄດ້ດີຕາມຄາດໝາຍ. ແຕ່ຍັງມີບາງໜ້າວຽກທີ່ຍັງບໍ່ທັນສຳເລັດ. ເຖິງຢ່າງໃດກໍຕາມ, ຄະນະກັມມາທິການການຕ່າງປະເທດ (ກຕປ) ຍັງໄດ້ຈະສືບຕໍ່ປະຕິບັດໜ້າທີ່ບຸລິມະສິດສຳຄັນຂອງຕົນຢ່າງເຂັ້ມງວດຕື່ມອີກ.

ພ້ອມກັນນີ້, ຜູ້ເຂົ້າຮ່ວມກອງປະຊຸມຍັງໄດ້ຮັບທິດຊີ້ນໍາທີ່ສຳຄັນ ແລະ ຮັບຂວັນກຳລັງໃຈຈາກປະທານກອງປະຊຸມ. ປະທານກອງປະຊຸມໄດ້ຊົມເຊີຍ ແລະ ຕີລາຄາສູງຕໍ່ໝາກຜົນສຳເລັດວຽກງານລວມທີ່ທາງຄະນະ ກຕປ ທຸກອົງຍາດມາໄດ້ ແລະ ປະກອບສ່ວນຢ່າງກະຕືລືລົ້ນ ໂດຍສະເພາະການຊ່ວຍເປັນເສນາທິການວຽກງານການຕ່າງປະເທດໃຫ້ແກ່ຄະນະບໍລິຫານງານປະຈຳການສູນກາງ ອພສ.

ນອກຈາກນັ້ນ, ປະທານກອງປະຊຸມຍັງໄດ້ກະຕຸກຊຸກຍູ້ ແລະ ແນະນໍາໃຫ້ ຄະນະ ກຕປ ທຸກອົງສືບຕໍ່ພະຍາຍາມ ແລະ ຜັນຂະຫຍາຍຂໍ້ຕົກລົງຂອງກອງປະຊຸມ ຫຼື ແຈ້ງການສະເພາະໜ້າໄປສູ່ວຽກງານຕົວຈິງດ້ວຍຄວາມຄິດສ້າງສັນ, ກ້າເຮັດ, ກ້າຕັດສິນໃຈ, ກ້ານໍາສະເໜີ ແລະ ກ້າຮັບຜິດຊອບຕໍ່ບັນຫາຕ່າງໆທີ່ເກີດຂຶ້ນດ້ວຍອຸດົມການເສຍສະຫຼະສູງ.

ກອງປະຊຸມດັ່ງກ່າວໄດ້ດຳເນີນເປັນເວລາ 4 ຊົ່ວໂມງກວ່າ ແລະ ໄດ້ປິດລົງດ້ວຍຜົນສຳເລັດອັນຈົບງາມ ໃນເວລາ 17:00 ໂມງ ຂອງວັນດຽວກັນ.